🛑 അനുഭവങ്ങളുടെ അടരുകൾ➖➖➖➖➖ 26 ➖➖➖➖➖ബാല്യകാല സ്മരണകൾ ✍️▪️▪️▪️▪️▪️▪️▪️▪️▪️▪️▪️വി വി ജോൺ•••••••••••••••••••••🕳️ എൻ്റെ ബാല്യകാലസ്മരണകളുമായി ബന്ധപ്പെട്ട് ഞാൻ മുമ്പ് എഴുതിയ കുട്ടിക്കാല അനുഭവങ്ങളുടെ ഒരു ഏട് വീണ്ടും ഇവിടെ ചേർക്കുന്നു.കാരണം ഇതും എൻ്റെ ജീവിതം തന്നെയാണ്.🔸🔸വാറ്റുപുരയും ആദ്യകുർബ്ബാനയും▪️▪️▪️▪️▪️▪️▪️▪️                  ▪️ ഓർമ്മകളുടെ കിളിക്കൂട് ഞരക്കത്തോടെ തുറന്നപ്പോൾ കിളികൾ ചിറകിട്ടറിച്ച് പറന്നുയർന്നു. കാലം , ആറ് പതിറ്റാണ്ടോളം പുറകോട്ട് സഞ്ചരിച്ച് , കിളികളോടൊപ്പം  തെരുവമലയിലെ ചെറിയ മരങ്ങളിൽ താവളമുറപ്പിച്ചു. മലനിറയെ തെരുവ പുല്ല് ആർത്തട്ടഹസിച്ച് നിൽക്കുന്നു. ഇരു വശവും മൂർച്ചയുള്ള വാളുകൾ പോലെ, കൗരവരെയും പാണ്ഡവരെയും പോലെ , യുദ്ധത്തിന് തയ്യാറായി നിൽക്കുന്നു. എരിതീയിൽ എണ്ണയൊഴിക്കുന്ന ശകുനിയേയും തത്രങ്ങളും കുതന്ത്രങ്ങളും മെനയുന്ന കൃഷ്ണനെയും മാത്രം അക്കൂട്ടത്തിൽ കണ്ടില്ല. ലക്ഷ്യം മാർഗ്ഗത്തെ സാധൂകരിക്കട്ടെ.▪️ ധാരാളം സ്ത്രീകൾ തെരുവ പുല്ല് മുറിച്ച് ചെറിയ കറ്റകളാക്കി കൂട്ടിയിടുന്നു. പുൽനാമ്പുകളെ തൊട്ടു കഴിഞ്ഞാൽ അവ വെറുതെ വിടില്ല. കയ്യും ദേഹവും മാന്തിക്കീറും. പുൽകറ്റകൾ മലയുടെ താഴെയുള്ള തോട്ടരികിലുള്ള വാറ്റുപുരയിലെത്തിക്കുന്നു. ▪️ ഒരു ചെറിയ വീടിന്റെ സന്നാഹങ്ങളെല്ലാമുണ്ട് വാറ്റു പുരയിൽ .ആറടി പൊക്കവും ഒത്ത വണ്ണവുമുള്ള ഒരു വലിയ ചെമ്പ് , ഒരു അടുപ്പിന്റെ മുകളിൽ സ്ഥാപിച്ചിരിക്കുകയാണ്. അതിനോട് ചേർന്ന് , എപ്പോഴും ശുദ്ധജലം ഒഴുകി നിറഞ്ഞു തുളുമ്പി ക്കൊണ്ടിരിക്കുന്ന ഒരു ഭീമാകാരനായ വീപ്പ. വീപ്പ മരം കൊണ്ട് ഉണ്ടാക്കിയതാണ്.ചെമ്പിൽ കുറെ വെള്ളം നിറക്കുന്നു. .ചെമ്പിന്റെ കിളിവാതിലിലൂടെ തെരുവ കുത്തി നിറക്കുന്നു. വാതിൽ അടച്ച് ചാണകം തേച്ച് പഴുതുകൾ അടക്കുന്നു. അടുപ്പിൽ നന്നായി തീ കത്തിക്കുന്നു. കിളിവാതിലിന്റെ വശങ്ങളിൽ കൂടിയൊന്നും ആവി പുറത്തേക്ക് പോകുന്നില്ലെന്ന് ഉറപ്പു വരുത്തുന്നു. ചെമ്പിന്റെ ശുഷ്കിച്ച മുകൾഭാഗത്തു നിന്നും വീപ്പയിലെ തണുത്ത വെള്ളത്തിലൂടെ വളഞ്ഞു വളഞ്ഞു പുറത്തേക്കു വരുന്ന ചെറിയ കുഴലിലൂടെ , നീരാവി തൈല കണങ്ങളായി കുപ്പിയിലേക്ക് ഇറ്റിറ്റുവീഴുന്നു. ഈ ദ്രാവകത്തിന്റെ പേരാണ് തെരുവ തൈലം . ഈ പ്രക്രിയയാകട്ടെ, ഇന്നത്തെ വിപുലമായ ഡിസ്റ്റിലറിയുടെ ഒരു കുഞ്ഞു പതിപ്പും.▪️ തെരുവ കൂടാതെ അപൂർവ സമയങ്ങളിൽ രാമച്ചത്തിന്റെ വേര് ഇതേ രീതിയിൽ വാറ്റി രാമച്ചതൈലവും ഉണ്ടാക്കാറുണ്ട്. ഭയങ്കരമായ അദ്ധ്വാനമുള്ള ഒരു പണിയാണിത്. കാർഷിക ഉൽപ്പന്നങ്ങൾക്ക് ഒന്നും വിലയില്ലായിരുന്ന കാലം. ചെമ്പടുപ്പിൽ ചുട്ടുതിന്ന കപ്പയുടെ രുചിയും ഒപ്പം നാക്കു പൊള്ളിയതും ഓർമ്മയുണ്ട്. ▪️ ദാരിദ്ര്യത്തിന്റെ മൂടൽമഞ്ഞിൽ വിറങ്ങലിച്ചു നിന്നിരുന്ന ഗ്രാമം . കല്ലും മണ്ണും പാമ്പും നിറഞ്ഞ ഒറ്റയടിപ്പാതയിലൂടെ ഞാൻ സ്കൂളിലേക്ക് നടന്നു. വീട്ടിൽ കഞ്ഞി വെക്കാൻ അരിയില്ലാത്തതു കൊണ്ട് പലദിവസങ്ങളിലും ഉച്ച ഭക്ഷണത്തിന് കപ്പ കൊണ്ടുപോയിട്ടുണ്ട്. ആ ദിവസങ്ങളിൽ കൂട്ടുകാരാരും കാണാതെ ഒറ്റക്ക് മാറി വേഗം കഴിച്ചു തീർക്കും. കപ്പക്ക് ഇന്ന് സമൂഹത്തിലെ തീൻ മേശക്ക് മുമ്പിൽ കിട്ടുന്ന അന്തസ്സും ആഭിജാത്യവും അന്നില്ലായിരുന്നു. ഒരു കീഴാള കിഴങ്ങുവർഗ്ഗ പദവി മാത്രമേ കപ്പക്ക് സമൂഹം നൽകിയിരുന്നുള്ളു.വൈകുന്നേരം സ്കൂളിൽ നിന്നും കിട്ടിയിരുന്ന ഉപ്പുമാവും പാലും വലിയ ഒരാശ്വാസമായിരുന്നു.▪️ എനിക്ക് ഏകദേശം 10 വയസ്സുള്ളപ്പോൾ എന്റെ ആദ്യ കർബ്ബാന സ്വീകരണത്തിന്റെ സമയമായി. പള്ളിയിൽ പോയി അത്യാവശ്യമുള്ള പ്രാർത്ഥനകളും നമസ്കാരങ്ങളും പഠിച്ചു. കുർബ്ബാന കൈക്കൊള്ളപ്പാടിന്റെ തലേ ദിവസം ശനിയാച്ച വൈകുന്നേരം കുമ്പസാരം എന്നൊരു പരിപാടിയുണ്ട്. കുർബ്ബാന സ്വീകരണത്തിന് എല്ലാവരും പുതിയ വെള്ള ഉടുപ്പും ഇട്ടാണ് പോകുന്നത്. എനിക്ക് പുതിയതില്ല. നിറം മങ്ങിയ ഒരു വെള്ള ഉടുപ്പ് ഉണ്ടായിരുന്നു. ആ ഉടുപ്പ് അലക്കാൻ ഒരു ബാർ സോപ്പുമായി ഞാൻ തോട്ടിലേക്ക് പോയി. പാറക്കല്ലിൽ ഉടുപ്പ് അലക്കി മുറ്റത്തെ അയയിൽ ഉണക്കാനിട്ടു. എൻറെ അമ്മ രോഗബാധിതയായി കിടപ്പിലായിരുന്നതു കൊണ്ട് ഇതൊന്നും ചെയ്തു തരാൻ എനിക്ക് ആരുമില്ലായിരുന്നു. ( അതിനടുത്ത വർഷം, എനിക്ക് 11 വയസ്സുള്ളപ്പോൾ, യാത്ര പോലും പറയാതെ , അമ്മ പോയി ) .▪️ ഉടുപ്പും അലക്കി മറ്റു ചില്ലറ ജോലികളും ചെയ്ത ശേഷം കുമ്പസാരിക്കാനായി ഞാൻ പള്ളിയിലേക്ക് ഓടി . ഞാൻ ചെന്നപ്പോഴേക്കും വികാരി നെടുമ്പള്ളിൽ അച്ചൻ കുമ്പസാരം നിർത്തിയിട്ട് എഴുന്നേറ്റു. മണിക്കടവ് ഗ്രാമത്തിന്റെ പ്രാണവായു നിലനിർത്തുന്നതിൽ മുഖ്യ പങ്കു വഹിച്ച വ്യക്തിയാണ് അച്ചൻ. നെടുമ്പള്ളി അച്ചൻ അന്യ നാടുകളിൽ പോയി ആഹാരസാധനങ്ങൾ തെണ്ടി കൊണ്ടുവന്നാണ് മണിക്കടവിനെ പോറ്റിവളർത്തിയത്."നീ കുമ്പസാരിച്ചോടാ "അച്ചൻ ചോദിച്ചു."ഇല്ല" ഞാൻ വിക്കി വിക്കിപറഞ്ഞു."നീ എന്താ സമയത്തിന് വരാഞ്ഞത് "" ഞാൻ ........."എന്റെ വാക്കുകൾ വക്കുപൊട്ടി തൊണ്ടയിൽ തന്നെ ചിതറി വീണു. ബാക്കിയുള്ളവ ആവിയായിപ്പോയി."എന്തായാലും വാ "അച്ചൻ എന്നെ വിളിച്ചു.ഞാൻ കുമ്പസാരക്കൂട്ടിൽ മുട്ടുകുത്തി നിന്ന് എന്തൊക്കെയോ പാപങ്ങൾ പറഞ്ഞു. അച്ചൻ പരിഹാര മാർഗ്ഗങ്ങളും പറഞ്ഞു. ആ പ്രായത്തിൽ , വയ്യാതെ കിടക്കുന്ന അമ്മയെ നോക്കുകയും കടയിൽ പോയി സാധനങ്ങൾ വാങ്ങുകയും ആടിനെ അഴിച്ചുകെട്ടുകയും സന്ധ്യയാകുമ്പോൾ കോഴിക്കൂട് അടക്കുന്നതും  ഒഴിച്ചാൽ മറ്റു പാപങ്ങളൊന്നും ഓർമ വരുന്നില്ല." അച്ചാ ഇനി ഞാൻ എന്താ ചെയ്യേണ്ടത് "പേടിച്ച് ഓടിത്തളർന്നു വന്ന ഞാൻ അടുത്ത നടപടി ക്രമങ്ങൾ മറന്നു പോയി.അച്ചൻ എന്നെ രൂക്ഷമായി നോക്കിയിട്ട് പറഞ്ഞു."നീ വീട്ടിൽ പൊക്കോ "അങ്ങനെ എന്റെ ഓട്ടപ്പാച്ചിലിനിടയിൽ ആ വർഷത്തെ എന്റെ കുർബാന സ്വീകരണം മുടങ്ങിപ്പോയി.▪️ ഇന്ന് ഒരു ആദ്യ കൂർബാന സ്വീകരണത്തിന് ഒരു കല്യാണ മാമാങ്കത്തിന്റെ അത്ര തന്നെ ആഘോഷങ്ങളെല്ലാം ഉണ്ട്. അനേകം കോഴികളുടെ എന്നെ കൊല്ലല്ലേ എന്ന നിലവിളികളും കുപ്പി പൊട്ടിക്കലും സമ്മാനങ്ങളും ........എല്ലാം.എന്റ ആദ്യകുർബാന സ്വീകരണത്തിന് കരിമ്പനടിച്ച ഒരു വെള്ളയുടുപ്പ് , ബ്രാൻഡ് നെയിം ഓർമ്മയില്ലാത്ത ഒരു ബാർ സോപ്പ് കൊണ്ട് , തോട്ടുവക്കിലെ കല്ലിൽ ഞാൻ തന്നെ കഴുകിയ തൊഴിച്ചാൽ മറ്റൊരുക്കങ്ങളും  ആഘോഷങ്ങളൊന്നുമില്ലായിരുന്നു.ഞാൻ പറയുന്നത് വിശ്വാസമില്ലെങ്കിൽ, ആനറാ മലയിൽ നിന്നും പിറന്ന് മണിക്കടവ് ടൗണിന്റെ മധ്യത്തിലൂടെ ഒഴുകുന്ന തോടിനോട് ചോദിക്കാം. തോട് ഇതുവരെയും നുണ പറഞ്ഞതായി കേട്ടിട്ടില്ല.അല്ലെങ്കിൽ, നഗരങ്ങളുടെ ബലാൽസംഗത്തിന് ഇരയാക്കപ്പെടുന്നതിന് മുമ്പ് ഗ്രാമങ്ങളുടെ വിശുദ്ധിയിൽ ജീവിച്ചിരുന്ന പരിശുദ്ധരായ മനുഷ്യരോട് ചോദിക്കാം. കുശുമ്പും കുന്നായ്മയും അല്പസ്വല്പം കത്തിക്കുത്തുമൊക്കെ ഉണ്ടായിരുന്നുവെങ്കിലും അവരും കള്ളം പറയില്ല.                 🌗🌗............. തുടരും ............